ZITTINGEN 2022

Aafgeloupe vriedig op de 11e van de 11e höb v’r ’t sezoen geäöpend. De tempel veur dit jaor is café Oos Heim. Iësj zin v’r natuurlik Raymond en Petra gaon bedanke veur hun gasvrieheid in ’t aafgeloupe jaor. Es nuuj lid van ’t comité van de carnaval höb v’r Martin Speetjens maoge insjtallere. En dao zin v’r erg blie mit. V’r wunsje häöm väöl succes en sjpas bie ós comité.

De daag d’r nao sjting ’t Sjömmerts Vastelaoves Leedjeskonkoer op ’t program. Mer leefs 17 deilnummesj zörgde veur ‘ne good gevölde aovend. Sjömmert is weer ‘ne sjoane sjlager rieker: Alaaf Versjlaaf van N.A.C.H.W.E.R.K. en same mit de winnaar van de presentatiepries Noats Gesjaote en hun leedje Alle Hens aan dek zulle ze optraeje op de Sjömmertse Zittinge. Dank aan de Auwt Prinse veur de organisatie en zeker dank aan ederein dae hie aan mitwèrk.

Kómmende waek gaon v’r gewoon door mit de carnaval in Sjömmert. Dónderdigaovend is de Seniorezitting in ’t Gemeinsjapshoes. De zaal geit aope óm 18:30 en óm 19:11 begint de zitting. De entree is € 7,50 en dao krieg g’r ouch nog ’n tas koffie mit e sjtök cake bie.

Vriedig is de Sjömmertse Zitting en Zaoterdig gaon v’r de nuje prins oetrope, de opvolger van Prins Wouter. Kaarte zin nog te koup bie Soons in de winkel.

Zóndig óm 14:11 begint de kingerzitting. Vanaaf 13:30 is de zaal aope en waere de kinger door de nuje prins óntvange mit ‘n traktatie. De entree veur de kinger is mer € 1,00. Volwassene betale € 5,00 óm binne te kómme.

De artieste höbbe good hun bès gedaon en nao twië jaor zónder zittinge höbbe die d’r ouch ech zin in.

V’r houpe väöl luuj te maoge óntvange óm d’r dan same gezellige aovende en ‘ne leuke middig van te make.

Alaaf

Vors Pascal, Prins Wouter en de Wieze Raod.