TAARBREUK NUUTS

V’r kinne truk kieke op ‘ne apaarte carnaval. In eder geval woort dae in minder daag gevierd es dat v’r dat anger jaore doon. De veurbereidinge lepe veur ós es Taarbreuk ouch gans angesj. G’r had ós ins mótte zeen zitte, allemaol heim achter de eige computer en dan vergadere via Teams. Wae houw dat oats gedach. Achteraaf kin v’r allein mer zègke dat ‘t zich waal geloand haet. V’r waore aangenaam verrasj door de reacties en door ‘t aantal luuj dat aan alle activiteite haet mitgedaon.

Achter väöl vinstere zaog v’r sjoan gekleurde kleurplate en anger creaties, hiël dèk same mit de poster dae te koup waor. Dank aan de COOP en ManJefiek veur de mitwèrking es aafhaol- en verkouppunt.

De actie mit de nónnevotte haet fantastisch geloupe, ouch mit dank aan de COOP veur de samewèrking. Het oetdeile van de traktaties veur de kinger, gecómbineerd mit de róndgank mit de fruitmendjes en ‘t bezörge van de nónnevotte zörgde veur gans get Taarbreuk verkiër op de zaoterdig.

De carnavalsmès op de zóndig waor ouch gans get apaarts. Gein vol kèrk meh waal hiël väöl  luuj die de mès van heim gevolg höbbe. Houpelik waor dit mer veur ein jaor want v’r vinge ‘t toch gezelliger es g’r d’r allemaol bie kint zin. Dank aan meniër Pesjtoar en Hans veur de samesjtèlling van de mès en dank aan ‘t kèrkbesjtuur veur ‘t initiatief veur de livestream.

Aan ‘t einde van de mès höb v’r dan toch eindelik de belofte die v’r veurig jaor gedaon höbbe kinne inlosse: Meniër Pesjtoar bedanke veur al die jaore dat hae same mit Hans es de ós en de aezel de carnavalsmès tot get unieks gemaak haet. Es dank daoveur höb v’r häöm ‘ne Taarman gemaak van cortensjtaol aangebaoje. Dit kado weurt allein gegaeve aan luuj die zich op ‘n speciaal meneer verdeenstelik höbbe gemaak veur De Taarbreuk en de carnaval in Sjömmert. Dizze Taarman is bedoeld óm boete te zètte want dit sjtaol weurt sjoaner door de waersinvloede. Natuurlik geit ouch  dank oet nao oud raodslid Peter Dols veur ‘t make van dit kado en de foto liët zeen dat meniër Pesjtoar neet lang hoofde nao te dinke euver ’n plaats óm ‘m te zètte.

In de middigoere lepe väöl luuj de hap-sjtap-sjpeur route en de kinger van de basissjoal zaote achter hunne computer te kiene. Veur Prins Wouter en Prinses Rimmi van CV De Groate waor ’t ’ne lange middig van nummerkes driëje en aafrope meh es ze dan de pap van de prins mit de geluidswage op paad kóste sjikke dan waor ’t dudelik dat örges weer ‘ne pries gevalle waor. Dae meziek zörgde ouch inins veur get carnavals geveul in ’t dörp. V’r danke de Jeugraod veur de samewèrking en gezeen ‘t groate aantal kinger dat mitdeeg waor dit zeker e succes te neume.

Ouch op maondig woort door väöl luuj de hap-sjtap-sjpeur route geloupe, sommige zelfs verkleid en mit meziek. Dit gaof ouch weer ‘ne leuke sfeer in ’t dörp.

Tot sjlot van dit weurdje wille v’r ederein danke dae zich ingezat haet óm d’r in dit apaart jaor get van te make. Speciale dank aan Prins Wouter en zien familie veur alle mitwèrking en óngersjteuning. Ouch dank aan Ger Derks veur ’t vertale van al dees tekste zoadat ’t veur ederein ouch laesbaar is wat v’r bedoele.

V’r kieke mit e positief geveul oet nao ’t kómmend sezoen, ’t sezoen van 6×11 jaor Taarbreuk Sjömmert.

Alaaf

Prins Wouter, Vors Pascal en de Raod van Ėlf.