TAARBREUK NUUTS

V’r sjrieve ’t lètste Taarbreuk Nuuts veur de carnaval en traditioneel weurt dit gesjreve in ’n road, gael, greun Parochieblaedje. Zoa ouch in dit apaart jaor. Van alle kante is geprobeerd d’r get van te make en oet de leuke reacties die v’r kriege make v’r op dat ‘t gewaardeerd weurt.

D’n aaftrap is dit jaor veur CV De Groate mit Friday Night Carnaval op de vriedigaovend. Zie organisere ‘ne online carnavalsaovend mit versjillende artieste.

Op zaoterdig waere de besjtèlde nónnevotte bezörg en ouch de traktaties veur de kinger die get gekleurd en/of geknutseld höbbe. Euveral wo v’r de kleurplaat of ‘t boewwerk zeen zul v’r get aafgaeve.

t ‘Krankebezeuk is vanwaege alle beperkinge verangerd in ‘ne róndgank mit de fruitmendjes. Dit zal ouch op zaoterdig plaatsvinge. V’r wille nogmaals benaodrökke dat v’r ós ech aan de maotreigele zulle houte en wie good v’r angesj ouch óntvange waere, dit jaor kin v’r jaomer genóg neet nao binne kómme. De 1,5 maeter zal gerespecteerd waere. De luuj die in de verzörgingstehoeze zitte zulle hun fruitmendje al op vriedig via de receptie van ‘t betreffende hoes kriege. Es g’r vraoge höb euver ‘t krankebezeuk dan kint g’r mit André Eijssen kóntak opnumme. Zien nummer is: 06-22 23 66 86.

Zondig óm 11:00 is de carnavalsmès en v’r zin erg blie dat die in eder geval kint doorgaon. Ómdat d’r mèr 30 luuj in de kèrk maoge en ómdat v’r weite dat normaal gesjpraoke väöl luuj op dizze daag nao dees mès kómme höb v’r same mit ’t kèrkbesjtuur besjlaote d’n deens via ‘ne livestream oet te zende. Via de  website van de parochie, www.st-remigius.nl , en via website van De Taarbreuk, www.taarbreuk.nl kint g’r  de mès heim volge. ’t Zal besjlis weer de meujte waert zin óm dit mit te make.

Vanaaf 12 oer kint d’r gesjtart waere mit de Hap – Sjtap – Sjpeur mit ’t gezin. Langs de route die g’r in de rökzak aantref sjtaon op ‘n aantal plaatse fotocollages opgesjtèld. En die sjtaon d’r natuurlik neet zoa mer. Dao hink ‘n opdrach aan vas.

De kinger die zich opgegaeve höbbe kinne sjmiddes mitdoon aan ‘t Carnavalskiene. De presentatie zal verzörg waere door Prinses Rimmi van CV De Groate en Prins Wouter en de pries waere ónger ‘t kiene heim gebrach door lede van de Raod. In 3 laeftiedscatagorieë weurt d’r via Teams veur leuke pries gekiend. De Jeugraod Sjömmert, CV De Groate en CV De Taarbreuk make d’r op dees meneer veur de jeug van de basissjoal ‘ne leuke middig van. Gesjtart weurt óm 13:11 mit de jóngste groep, óm 14:33 is groep 4, 5 en 6 aan de beurt. Veur groep 7 en 8 begint ‘t óm 16:11.

En dan op maondig, nao ‘t kiene van de zóndig, kint d’r vanaaf 12:00 oer weer geloupe waere mit Hap – Sjtap – Sjpeur mit ’t gezin. En es v’r dat mit genóg luuj doon dan höb v’r toch e saort optoch door de sjtraote. Hout waal estebleef de 1,5 maeter in de gate!

Bie de äöpening van dit sezoen sjreve v’r al dat v’r zouwe blieve kieke nao wat waal kint. Dat höbbe v’r gedaon, en veer neet allein. Van versjillende kante zin d’r initiatieve óntsjtange en is d’r mitgedach. Dao zin veer hiël blie mit. Zeker noe bliek dat ‘t woord same in ós dörp ech get beteikent.

Alaaf

Prins Wouter, Vors Pascal en de Raod van Ėlf.