PRINSERECEPTIE

Bèste luu, veer maoge weer trukkieke op ’n fantastisch en hièl drökke prinsereceptie. Zóndig waor de prinsereceptie wo hièl väöl luu Prins Tim I, z’n ouwersj Nicole en Lou zin kómme felicitere. Väöl Sjömmertse vereiniginge waoore dan ouch dao óm Tim te bedanke veur al ’t werk wat ‘r deit binne de vereiniginge wo hae lid van is. Dit jaor houwe v’r ouch nog 3 jubilarisse die door de BCL gehuldig zin gewoore. Pascal Kuipers ómdat hae 11 jaor penningmeister van de Taarbreuk is, en dat naeve zien functie es Vors. Dat is toch ’n prestatie van formaat, dank hie veur Pascal. Ger Kicken ómdat hae 11 jaor bie ’t comité is en hièl verdeenstelik is veur de Sjömmertse gemeinsjap zoa wie bleek oet de väöle weurdjes van de versjillende vereiniginge die häöm op de receptie kaome bedanke veur ziene inzat. Niks is Ger te väöl bleek oet al die toesjprake, bedank Ger. Ouch Marc Kuypers kreeg van de bónd ’n medaille ómdat ‘r 11 jaor lid is van de Raod van Èlf en of dat nog neet genóg is kreeg ‘r van Börgemeister Schmalschläger ouch nog de orde van verdeenste veur zien väöle werk binne de Taarbreuk. Veer maoge gebroek make van zien muzikaal talente en hae deit ouch väöl werk veur ’t leedjesconcours, ’n deil van de opnames gebeure bie häöm in de studio. Zoa kin v’r nog waal get blieve doorgaon, Marc proficiat mit de verdeende orde van verdeenste van de gemeinte.

Väöl dank aan alle luu die oze nuuje Prins Tim I zin kómme felicitere, ’t waor ’n ónvergaetelike receptie wo weer väöl luu van Sjömmert me ouch zustervereiniginge nao toe zin gekómme óm de Carnaval ouch ’n werm hart toe te drage. Väöl dank daoveur, ouch names de jubilarisse.

Alaaf van Prins Tim I, Vors Pascal en de Wieze Raod.