DANKWEURDJE PRINS TIM I

Bèste luu, Ich dink dat v’r same kinne trukkieke op weer ene gesjlaagde Carnaval. Zeker veur mich, es 61e prins van Sjömmert, waor ’t ene geweldige tied. Hie Hóbbe zeker ouch mien familie, vrung en alle andere carnavalsvierders van Sjömmert aan biegedrage. Ederein dank daoveur! De carnaval is veur de Taarbreuk ene drökke tied mit väöl activiteite. En al die activiteite zin sjiek óm mit te maoge make. Zao waor d’r dit jaor veur de ièsjte kièr ene ‘rumpelmiddig’ georganiseerd door de KBO veur de 50+’ers. Ene gezellige middig wo ederein zich good geameseerd haet (’n activiteit die zeker veur herhaling vatbaar is). Ouch de oud-prinse houwe de zaoterdig weer e geweldig fiès neergezat mit es thema: ‘laot uch gaon op de maon’.

Op zóndig woort ich in de vreuge mörge al aafgehaold door de sjötterie, fanfaar en dansmariekes veur de carnavalsmès. Ouch dit jaor waor ’t weer ’n sjoan mès mit humor, sjaon weurdjes en natuurlik ’n sjieke biedrage van ’t kingerkoar ‘DievanOss’. Menièr Pestjoar, Hans en ederein dae haet gehólpe, nogins bedank veur de organisatie van dees mès. Zoaget is hièl bezónder en ’n traditie wo Sjömmert gruètsj op maog zin.

De maondig waor veur mich de sjoanste daag. öndanks dat in de mörge nog neet duudelik waor of de waercode noe road, gael of greun waor, ging de optoch gelökkig door en sjtónge alle deilnummersj óm 14:11 oer paraat. De optoch waor fantastisch, mit väöl deilnummersj, die sjtök veur sjtök get leuks höbbe neergezat. Ouch de raege haet netjes gewach mit valle totdat v’r binne waore. Daonao höb veer d’r in ’t gemeinsjapshoes en ónger de cafébezeuke nog e sjiek fièske van gemaak.

En veur das te ’t wèts is ’t alweer dinsdig en mós te de taarbrook gaon inlevere. Die höb v’r dinsdigmiddig ièsj nog mótte ophaole mit väöl kinger en hun instrumente. De energie van al die kinger, dat hilt dich de lètste daag ech op de bein. Geweldig óm te zeen wie die zich kinne amesere op zoane carnavalsmiddig. Ouch waor ’t veur de Taarbreuk de lètste kièr in ’t oud gemeinsjapshoes. Saoves höb ich, nao de cafébezeuke, de taabrook definitief mótte inlevere bie de Taarbreuk en höb v’r de carnaval mit ene knaller kinne aafsjlete.

Tot sjlot wil ich gaer de Raod bedanke veur de aafgeloupe carnaval. Zie höbbe mich dit jaor, es 61e prins van Sjömmert, op sjleiptouw genómme. En zónger dees 11 manne is ene prins neet compleet. Sjtök veur sjtök zin ze belangriek en drage ze bie aan de vereiniging en aan de Sjömmertse carnaval. Dank daoveur!

Veer sjtaon de 11e van de 11e weer paraat! Alaaf Prins Tim I.