TAARBREUK NUUTS

3 JANUARI 2019


Aan ’t begin van ’t nuuj jaor wille veer ós gaer aansjlete bie alle goods dat zich ederein toewunsj. Meh direk aan ’t begin van dat nuuj jaor höb veer toch ouch al ’n minder leuke boodsjap. Vlak veur de fiësdaag haet oze secretaris Piet Keulers aangegaeve dat hae geit sjtoppe es secretaris en es lid van ós vereiniging. Zien gezóndheid liët ’t neet mië toe óm ’t lidmaatsjap volwaardig in te völle. Daoróm haet hae jaomer genóg de besjlissing mótte numme óm nao dit sezoen te sjtóppe. Hae zal op de achtergrónd het secretariaatswerk doon tot aan ós jaorvergadering dizze zomer. Bie ós activiteite zal hae neet mië in ’t raodskostuum aanwezig zin. Wie jaomer dat veer ’t vinge, begriepe veer waal zien besjlissing en veer zulle hie zeker nog op truk kómme.

Alaaf.
Vors Pascal, Prins Stan I en de Wieze Raod.


DINERE OP SJIEK. 

Dinere op sjiek veur nuuj dansmariekes pekskes, dat gaon v’r op 12 januari doon. De veurbereidinge driëje op volle toere en ’t belaof ‘ne sjitterende aovend te waere. D’r zin nog get plaatse vrie en g’r höb nog tot en mit zóndig 6 januari de tied óm ‘ne sjtool te reservere. Dat kint g’r bie Edward in de winkel doon of gans gemekkelik via dees site. Veur degene die neet wille mit aete: Nao aafloup van ’t diner gaon de deure veur ederein aope óm d’r same nog ‘ne gezellige aovend van te make! ’t Leefste höbbe v’r natuurlik dat g’r mit kómp aete en genete van ‘ne unieke aovend wo de inwendige miensj goof verwind weurt mit passende meziek en zank van Celine Weert. En daobie help g’r de dansmariekes ouch nog aan nuuj pekskes!

Alaaf.
Vors Pascal, Prins Stan I en de Wieze Raod.