OPENING SEIZOEN

OPENING SEIZOEN 11-11-2017


Bèste luuj,

Aafgeloupe  zoaterdig op de 11e van de 11e höbbe veer weer het nuut sezoen geöpend. Veer zin begós bie ’t Weverke mit het ophoale van oos foto’s womit veer ooze tempel aankleije. Natuurlik höbbe veer Raymond en Petra bedank veur hun gasvrieheid in het aafgeloupe sezoen.

Boete höbbe veer eine groet aan ooze Taarman gebrach en heum de carnavals sjaal omgedoan zoadat dea zich auch al kint opwerreme veur de kommende carnaval.

Bie Oos Heim aangekomme heat Prins Tim I, es gooje sjut, de ballonne aafgesjoate en gezörreg dat ederein zuut dat doa de tempel veur het sezoen 2017-2018 is. Einmoal binne hub veer de vereinigingsfoto’s weer opgehange. Aan de hand van een sjoan foto collaasj, gemaak door Alain en Britt höb veer het veurig sezoen nog eens in gedachte loate passere.

Marc Wiekken houw aangegeave dat hea wool sjtoppe es veurzitter en es lid van oos carnavalscomité, get wat veer erreg joamer vinge. Omdat hea dit werrek alweer 11 jaor houw gedoan heat hea doamit auch verdeend om een Deens Orde van de BCL te kriege. Die höbbe veer heum dan auch moage oetreike. Marc, vanaaf dees plaats nog eens hièl veul dank veur dien veule werrek in het comité en veer zin erreg blie das te oos wils blieve hellepe wo dat nuèdig is.

Veer höbbe  nog 2 jubilarisse dit joar namelik Roger Slakhorst, 11 joar lid en Marc Vroemen, 22 joar lid. Op de prinsereceptie kint geer hun doamit komme felicitere.

Veer goan noe door mit de veurbereidinge veur het sezoen wo ver aan goan beginne en onger angere mit de verhoezing noa het nuut Gemeinsjapshoes, en alles wat doa bie kump kieke, sjteit oos weer ein nuuj oetdaging te wachte.

Geer goat het mitmake!

Alaaf

Prins Tim I, Vors Pascal en de Wieze Road


 


KLIK HIER VOOR MEER FOTO’S