DANKWEURDJE PRINS STAN I

Leef luuj,

Wat höb ich genaote sinds mien oetreuping tot 62e prins van de Taarbreuk van Sjömmert. De carnaval waor veur mich, Donneé, mien familie, mien geweldig gekke vrung en gans Sjömmert ‘n geweldig fiès veur jónk en oud. Hièl sjoan en sjiek óm dit te maoge mitmake es prins. Daoveur wil ich uch hièl erg bedanke.

Wat sjteit ‘t programma van de Taarbreuk toch vol, bienao gein moment rös! Me elke activiteit haet zien eige karakter en is genete. Ouch weurs te es prins perfec begeleid bie elke activiteit en weurs te ummer thoes opgehaold en weer thoesgebrach. Houpelik doon ze dit boete ‘t sezoen ouch nog.

Op zóndig woort ich opgehaold door de sjötterie, fanfaar, Raod en dansmeriekes. Óndanks dat ich ze get laat hoort aankómme is dit toch ech ‘n sjoan moment. In de koetsj nao de kèrk, de mès en de hièle zóndig waor toch hièl sjoan, ech ‘n belaevenis. Daoveur wil ich menièr pesjtoar, Hans, ‘t Gemenk Kèrkelik Zangkoar en ederein dae hie aan mitwèrk nogmaals bedanke.

De maondig, de optoch dae hagelwit begós, kleurde aan ‘t eind van de Nuujsjtraot gelökkig toch al gauw weer road, gael en greun. Dao baovenin höb ich genaote van alle luuj en kinger langs de kant. Mer d’r waore ouch väöl luuj die mit lepe. Ich höb mit bewondering gekeke nao al dat wèrk wat ederein hie in haet gesjtaoke. Dat geuf de optoch de kleur die ‘r verdeent. Nao dat alle sjloek oetgegoajd waor zin v’r nog nao ‘t gemeinsjapshoes, Oos Heim en ‘t Weverke gewaes en dao waor ‘t nog lang gezellig.

Sjnel es ‘t geit is ‘t al weer dinsdig, en dan mós te de brook alweer gaon inlevere. Ièsj zin v’r die gaon ophaole bie de pastorie mit de kinger en hun instrumente. Óndanks dat mien kaers bienao opgebrand waor bleve die kinger mer gaasgaeve. Gelökkig kós ich mich dao sjoan aan optrèkke. V’r höbbe d’r same nog ‘ne fantastische sjpringmiddig van gemaak mit ‘ne leuke kwis en optraejes. In de aovend höb v’r en bie Oos Heim en bie ‘t Weverke de carnaval aafgesjlaote. Mit pien in mien hart möt ich uch zègke. Me ouch op de dinsdig doerde ‘t fièske tot in de vreug urkes óm oeteindelik ech te sjlete bie ‘Café Willems’.

Tot sjlot wil ich gaer vors Pascal, ziene Wieze Raod en de ganse Taarbreukfemilie bedanke veur de geweldige carnaval dae v’r same belaef höbbe.
Alaaf,

Prins Stan 1


Bèste luuj van Sjömmert,

Zoa wie Prins Stan I ‘t ouch al sjrief in zien dankweurdje kinne veer weer trukkieke op ‘ne geweldige carnaval, en bie ziene dank sjlete veer ós gaer aan. Eder jaor waere v’r weer verrasj door de inzat en sjpas die ‘t ganse Taarbreukriek lièt zeen veur en ónger die drie gekke carnavalsdaag.

Van alle kante dinke en wèrke väöl luuj mit. Allein al op zóndig mit ‘t aafhaole van de prins, de mès en ‘t oplaote van de Taarbrook. Wieväöl vereiniginge en luu hie bie betrokke zin. D’r waere zelfs kèrkelike tekste op de Taarbreukmelodie gezónge. En dan op maondig de optoch. Boete de dik 500 persone, groat en klein, die mitloupe zin d’r ouch nog ‘n groat aantal luuj bezig om alles in gooj bane te leije. Carnavalscomité, verkièrsrsreigelaers, jury,  tèlcommisie óm d’r mer ins ‘n paar te neume.  Euver inzat en sjpas gekald!

En zoa kinne v’r nog waal effe doorgaon. ‘t Waor ‘n groat fiès dat v’r same make en viere. Bedank hieveur.

Speciaal wille v’r toch Prins Stan I en zien femilie bedanke. Stan is op ‘n geweldige meneer veurgegange en zien femilie haet d’r ouch alles aan gedaon óm dat meugelik te make. En same mit, wie hae dat ummer zaet, zien geweldig gekke vrung waor ‘t wéér ‘n sjiek sezoen.

Name neume is gevièrlik me eine wille v’r toch neume en dat is dae van Ger Derks dae van al dees en anger tekste good Sjömmerts wèt te make. Ich kin uch verzekere dat dat neet ummer mitvilt.

Tot sjlot wille veer ederein bedanke dae mitwèrk en mitdink om de carnaval in Sjömmert sjpringlaevend te houte.

Alaaf, Vors Pascal en de Wieze Raod.