TAARBREUK NUUTS
Prins Wouter I haet ‘t al oetgebreid besjreve: v’r höbbe weer ‘ne sjieke carnaval belaef. Van jónk tot oud, veur ederein waor d’r waal get te doon van de dónderdigaovend tot de dinsdigaovend. ‘t Is ‘ne echte marathon te neume.
Boete ‘t feit dat v’r veur de 2e kiër op rie de prins neet höbbe kinne aafhaole op de zóndig door ‘t waer, zal dees mès ós toch op ’n speciaal meneer bie blieve. Op de iësjte plaats dank aan ‘t dameskoar en René veur de zank in dees mès en dank aan de dames die veur de versering in de kèrk zörge. Ouch dank aan de Fanfaar en de Sjötterie veur de sjoane meziek.
Es sjlot van de mès kaome d’n os en d’n aezel nog ‘ne kiër d’n altaar op. Nog eine kièr óm ‘n act veur ós op te veure. En in dees act gaove ze aan dat dit de lètste carnavalsmès waor wo Pesjtoar Van Oss in veurging. Veur ós ’n complete verrassjing. Dao sjtónge v’r dan mit ós good fetsoen en laeg heng. En dat lètste vóng v’r nog ‘t ergste. Meniër Pesjtoar en Hans: same höb g’r de carnavalsmès gemaak tot get unieks wo veer en de luuj in de kërk nao oetkieke. De humor mit ’n serieuze boodsjap d’r in versjtóp haet de kèrk eder jaor doon lache. Dank wil v’r nogmaals oetsjpraeke aan uch allebei en v’r gaon op zeuk nao e moment óm hie nog ins op truk te kómme.
G’r höb dees taak op dae zóndig doorgegaeve aan de twiè kapelaons Stephan en Charles. Ze maoge in eder geval op alle sjteun en mitwèrking van De Taarbreuk raekene.
Aan prins Wouter I en ‘t gezin Hautvast-Lemmens wil v’r dank oetsjpraeke veur de gasvrieheid en veur alles wat v’r same höbbe maoge belaeve. Veur de iësjte kiër in de historie te gas op de Klever en dao hout veer allein mer gooj herinneringe aan euver.
Tot sjlot dank aan ederein dae op wat veur meneer dan ouch ’n biedrage levert aan de Sjömmertse carnaval mit eine naam in ’t bezónder: Ger Derks, dat is de man dae al dees tekste corrigeert en zörg dat g’r in dit blaedje ouch kint laeze wat veer uch wille vertèlle.
Alaaf
Vors Pascal en de Wieze Raod.