CARNAVAL IN SJÖMMERT
Es g’r dit laes dan sjtaon v’r aan ‘t begin van carnaval 2020. Dónderdigaovend begin v’r bie ’t Weverke mit de jeug van de vereiniginge. Altied ‘ne super gezellige aovend wo de aanwezige jeug zich erg good ammeseert.
De vriedig is veur de sjoalcarnaval. Vanwaege de anger sjoaltieje is dit program get aangepas. Alle kinger beginne tegeliek sjmörges bie ’t Weverke. Rónd 11:00 zal dao de sjoalprins en sjoalprinses oetgerope waere. De optoch van de sjoal vertrèk om 13:11. Aan ‘t eind van de optoch is de sjoalcarnaval veurbie meh maog ederein natuurlik waal truk nao ’t Weverke. Dao giet ’t fiëske nog effe door.
De vriedig aovend is de gebrukelike sjleuteleuverdrach. Dit jaor is Wienesrao aan de beurt om die te organisere. ‘t Program begint óm 19:00 en de sjleutele waere tösje 20:00 en 21:00 oetgereik. Ouch de Órde van Verdeenste zal op dizze aovend oetgereik waere aan Ger Kicken. ‘t Adres van de aovend is ‘t Kesjtiël van Wienesrao en ‘t is veur ederein toegankelik.
Zaoterdig sjleet v’r ’t krankebezeuk aaf en gaon v’r nao de luuj die in de ziekehoeze ligke. Es g’r wèt wae in e ziekenhoes lik dan maog g’r ós dat laote weite. Sjmiddes gaon v’r natuurlik ouch nao de Rumpelmiddig en saoves gaon v’r bie de Auwt Prinse kieke welke circusartieste dao allemaol zin kómme opdage.
Zóndigmörge marchere v’r same mit de sjötterie en de fanfaar nao de Kleversjtraot óm Prins Wouter I en zien familie aaf te haole veur de carnavalsmès. Aansjletend gaon v’r bie de Pastorie De Taarbrook oplaote es officieel begin van de carnaval. De sjpringmiddig veur de kinger is bie ’t Weverke mit aansjletend ‘t ‘aete mit de Prins’. In de aovend zulle veer nao Oos Heim en nao ’t Weverke gaon.
De maondig is de daag van de optoch. Opgaeve kint nog t/m donderdig 20 februari via ’t secretariaat van de Taarbreuk; info@taarbreuk.nl
Insjrieve en aafhaole nummersj is op zaoterdig 22 februari tusje 20:00oer en 21:00oer bie Café Oos Heim.
En dan is ‘t nog neet gedaon. De dinsdigmiddig is weer veur de jeug mit de Olympische Prinssjpele in ’t Gemeinsjapshoes. Dit jaor kinne de kinger dao ouch gesjmink waere. Hienao weurt ’t toch ech tied óm de brook te gaon inlevere. V’r haole ze op bie Oos Heim en bie ’t Weverke weurt ze ingeleverd. Óm 23:11 sjlete veer de carnaval meh de ervaring lièrt dat ‘t dan nog neet gedaon is.
D’r weurt väöl georganiseerd in Sjömmert mit die daag en de precieze informatie mit alle tieje kint g’r trukvinge in de flyer ‘Carnaval in Sjömmert’. Dank aan de GOS veur ’t meugelik make van dizze flyer.
Daobie raoje veer uch aan óm ós website www.taarbreuk.nl en ós facebook pagina in de gate te houte. Es v’r nog get te melle höbbe dan zul v’r dat hie op doon.
Alaaf en tot op ein van de väöle activiteite die geörganiseerd waere.
Prins Wouter I, vors Pascal en de Raod van Èlf.