DANKWEURDJE PRINS MAX I

Leef luuj,

De carnvalsdaag zitte d’r óngertösje al weer op. Wat höb ich hie van genaote. Mit die daag waor d’r allein mer eine groate lach op mien gezich te zeen. Dae lach is begós vanaaf ’t moment dat ich gevraog woort om de 69^e Prins van Sjömmert te waere en daonao is hae neet mië weggegange.

Es te dan op de zaoterdigzitting in sjpanning zits te wachte op ’t moment das te dich eindelik maogs gaon ómkleije, oet ’t tiedmesjien maogs sjpringe en de óntlading van de zaal maogs heuëre, dat is ’n geweldig geveul, neet te besjrieve.

En dan begint ’t ech. De agenda van De Taarbreuk zit gans vol. Te beginne mit de kingerzitting, d’n iësjte activiteit es Prins. Hienao volge de krankebezeuke die väöl indruk op mich gemaak höbbe. ’t Is sjoan óm te zeen wie de luuj reagere es v’r opins aan de deur sjtaon, meistal mit ‘ne lach meh sóms ouch mit ’n traon. V’r zin nao versjillende recepties maoge gaon en ouch hie is ’t sjoan óm te zeen wie de carnaval laef in ‘n anger dörp.

De carnavalsdaag waere aafgetrap op dónderdigaovend mit de jeug van de versjillende vereiniginge. Die laote ós zeen dat de carnaval nog toekóms haet in Sjömmert. Op vriedig zin v’r de daag begós mit de sjoalcarnaval, in ’t begin zin de kinger nog get verlaege meh es v’r effe bezig zin kómme ze toch los en wille ze gaer danse en sjpringe. Vriedigaovend waor de sjleuteleuverdrach in ós eige dörp. Dat waor gesjlaag en zeker speciaal dat ich de sjeutel oet heng van de börgemeister in ós eige Gemeinsjapshoes moch kriege. V’r höbbe dae aovend aafgesjlaote in ’t Weverke bie Friday Night van CV De Groate, ummer ‘ne aovend óm ins lekker gaas te gaeve.

Zaoterdigmiddig zin v’r begós op de Rumpelmiddig. Hie zaot natuurlik ’n gans anger laeftiedscatagorie in de zaal es dat v’r op vriedig gezeen höbbe meh ouch die luuj weite d’r waal degelijk e fiëske van te make. Saoves waor de aovend van de Auwt Prinse en die houwe es thema “Veer trèkke van Laer”. Hie höb v’r weer väöl origineel dinger maoge zeen.

En dan kump de zóndig, te beginne mit ’t aafhaole óm nao de mès te gaon. Dit waor ’n sjoan moment. Noa ’n lekker drenkske zin v’r nao de kèrk getrokke en höb v’r kinne loestere nao ’n sjoan mès, gedaon door de kapelaons Stefan en Sintus. Aan ’t einde heivan kump dan toch ’t moment dat ich mien weurdje moos doon. Es te zuus wieväöl luuj dat in de kèrk zitte dan geis te toch mit get sjpanning aan de microfoon sjtaon meh einmaol aan de kal voolt ich mich al sjnel op mien gemaak.

Maondig is de daag van d’n optoch, ein van de dinger wo ich toch waal ech nao oetgekeke hou. Mit e lekker zunneke baove op dae prinsewage koos miene daag neet mië kapot. Sjoan óm te zeen wie alle deilnummesj zich de meujte gedaon houwe en wieväöl plezeer de luuj langs de kant höbbe.

Dan zin v’r al op de dinsdig aangekómme, de lètste daag alweer. In de middigoere sjpringe mit de kinger in ’t Gemeinsjapshoes en saoves ’t aafsjlete bie ’t Weverke. Es Prins wils te dan dat ’t nog lang neet gedaon is. Dees carnavalsdaag zin veurbie gevlaoge meh toch kins te ouch van dizze daag genete en höb ich ’t op ’t einde van de daag neet gans dreuëg kinne houte.

Tot sjlot wil ich De Taarbreuk, mien familie, mien vrung en ederein dae mitgeholpe haet d’r veur mich en mien ouwesj ‘ne onvergaetelike carnaval van te make bedanke. Ech waor, es ich d’r op truk kiek loup ich nog ummer vol mit traone. Allemaol bedank!

Alaaf, Prins Max I

De sjoan weurd van Prins Max I omsjrieve ouch de meneer wie veer carnaval 2025 belaef höbbe. De zón brach ’t leech en de lach van de luuj zörgde veur de sjpas. Euveral wo v’r kaome waor d’r plezeer en väöl luuj die plezeer houwe. ’t Waor in eder geval e sjiek sezoen wo v’r mit väöl dankbaarheid aan truk dinke. V’r wille op de iësjte plaats Prins Max I en zien ouwesj bedanke veur de meneer wo op zie ’t höbbe ingevöld. Natuurlik ouch dank aan ederein dae, op wat veur meneer dan ouch, zien biedrage levert aan de carnaval in Sjömmert. Same weit v’r d’r eder jaor weer get unieks van te make. Eine persoon wil v’r toch mit naam neume: Ger Derks. Dank veur ’t controlere en corrigere van al ós tekste nao ’t good Sjömmerts. Mit dees weurd sjleet v’r carnaval 2025 noe ech aaf,

Alaaf

Vors Pascal en de Raod van Èlf