DANKWEURDJE PRINS JULES I
Bèste Luuj,
Vanaaf ‘t moment dat de dansmariekes mich ómdriëjde en ‘t ganse dörp wees dat ich de 63e prins van de Taarbreuk van Sjömmert bèn höb ich allein mer kinne genete van eder moment. Want, wat ‘n belaeving! Ich kin nog ummer neet begriepe wieväöl sjieke en leuke reacties ich höb g’had. Nogins miene dank hieveur. Meh veural dank aan ederein dae haet biegedrage aan alweer e geweldig carnavalsjaor in Sjömmert.
De carnaval höb ich dit jaor same mit de Taarbreuk maoge mitmake en wat höbbe die jónges e drök program. D’r is waal eder moment get wo ze zich veur inzètte of wo ze zich sumpelweg aeve wille laote zeen óm same mit de luuj te viere. Es prins weurs te perfec begeleid óm bie eder evenement alles d’roet te haole en deveur te zörge dat jónk en oud ‘t nao ziene zin haet.
Zaoterdig zin v’r op ‘ne oetverkochde rumpelmiddig maoge zin. Aan de väöl luuj die dao zin zuus te dat carnaval veur ederein is.
‘t Aafhaole op zóndig ging jaomer genóg neet door ómdat ’t waer te sjlech waor. Dat is natuurlik jaomer meh ‘t waor neet angesj. Óm in ‘n vol kèrk te maoge veurlaeze deit dat al gauw vergaete. Geweldig óm mit te maoge make!
‘t Leek aeve d’r op dat zelfs de optoch ouch neet door zou gaon op de maondig door ‘ne flinke sjtorm vreug in de mörge. Gelökkig is alles good gekómme en höbbe v’r de optoch zelfs in ‘t zunneke maoge loupe. Veur mich waor dit ‘ne prachtige optoch mit väöl deilnummersj die de heng oet de moewe höbbe gesjtaoke óm dae felbegeerde 1e pries te winne. Mien cómplimente aan ederein en geer höb ‘t same mit ‘t väöle publiek veur mich onvergaetelik gemaak.
Veur dat ich ‘t überhaup in de gate hou waor ‘t alweer dinsdig. Mit sjmiddes de prinsesjpele veur de kinger in ‘t gemeinsjapshoes waor deze daag energiek begós. De kinger dege allenei hun bès óm de sjpelkes zoa good meugelik oet te veure en zoa höb v’r d’r same ‘ne sjieke middig van gamaak. Saoves is ‘t dan tied óm de brook in te levere bie Vors Pascal, dae mich daonao dan weer truk gaof aan mien vrung. Carnaval höb veer daonao same aafgesjlaote tot in de late urkes.
Femilie, vrung en ederein dae mich ‘n onvergaetelik jaor haet gegund, hartsjtikke bedank. Ich hou dit veur gein goud wille misse!
Tot sjlot wil ich gaer Vors Pascal, ziene Wieze Raod en de Taarbreukfemilie bedanke dat ze dit veur mich verwezelik höbbe en natuurlik veur de goej zörg!
Alaaf
Prins Jules I
De carnaval van 2019 kin v’r zeker gesjlaag neume. Prins Jules I sjreef het ouch al in zien dankweurdje. ‘t Fiës weurt in ós dörp door luuj van alle laeftieje gevierd, dat höb v’r dèkker es ins maoge ervare. Es op dónderdigaovend begós weurt mit de jeug van de vereiniginge en op de vriedig dao de sjaolcarnaval achteraan kump dan weite v’r dat ouch die jeug gelökkig nog wèt wat carnaval viere inhilt.
Boete de zóndigmörge haet ‘t waer gelökkig good mitgewèrk. Jaomer dat v’r Prins Jules I neet höbbe kinne aafhaole meh de carnavalsmès mit Sing a Song, verzörg door meniër Pesjtoar en Hans maak dat gans good. Mit ‘t oplaote van de Taarbrook sjeen zelfs weer ‘t zunneke veurzichtig. En dan begint de maondig ouch weer mit sjtorm en raege. Meh wie dát einmaol oetgeraos waor kóste v’r genete van ‘ne geweldige optoch. En dae make v’r toch ech same. Deilnummersj, carnavalscomité, verkiërsrsreigelaers, jury en tèlcommissie allemaol väöl dank hieveur.
En zelfs op de dinsdig weurt ’t fiës nog volop gevierd. Van de prinsesjpele tot nao ’t sjlete, ’t blif geweldig.
Prins Jules I en zien femilie wil v’r zeker bedanke. Hae haet genaote van ziene carnaval es prins van Sjömmert en dat sjtraolde hae ouch oet. Zien femilie haet häöm dao geweldig bie óngersjteund.
En dan toch eine naam: Ger Derks, óze vaste vertaler dae zörg dat dit allemaol laesbaar in dit blaedje kump. Ger dank hieveur.
En dan sjleet ich aaf mit ederein dae mitdink, mitwèrk en mitdeit te danke. Op dees meneer hout v’r same de Sjömmertse carnaval in sjtand!
Alaaf
Vors Pascal en de Wieze Raod.