CARNAVAL IN SJÖMMERT

Mit de carnavalsdaag veur de deur kiek v’r nog effe truk nao ’t aafgeloupe weekend. Zaoterdig woar d’r ‘ne gezellige aovend in Brasserie Bie Ein wo v’r same mit CV De Groate ‘t (F)Auwt Wieverbal georganiseerd houwe. Wie van ouds waore d’r sjoan verkleide luuj en groepe en prins Loek I haet dao same mit prinses Loïs en hofdame Chirèl de prieswinnaars oetgezeuk. Proficiat aan dees winnaars en dank aan ederein veur de aanwezigheid en gezelligheid.

Ouch ’t krankebezeuk höb v’r zoa good es klaor. Kómmend weekend zulle de luuj die in ’t ziekehoes ligke nog bezeuk waere. Es g’r wèt wae in e ziekehoes ligk dan heuëre veer dat gaer.

En noe gaon DE daag dan toch ech beginne. Dónderdig mit de jeug van de vereiniginge in ’t Weverke en vriedig dao de sjoalcarnaval achteraan. Saoves is de sjleuteleuverdrach in Vaosje, in de prachtig verbouwde kèrk. Vanaaf 20:00 weurt dao de mach euvergedrage aan de prinse oet de vreugere Gemeinte Nuth. Ederein is hie welkom. Truk in Sjömmert gaon v’r zeker ouch nao ’t Weverke veur Friday Night van CV De Groate en de Sjömmertse Carnaval in de café.

Zaoterdig sjteit de Rumpelmiddig in ’t Gemeinsjapshoes op ’t program en in de aovend oere “D’r waor ins” van de Auwt Prinse in ’t Weverke. Van 20:00 tot 21:00 kint g’r uch dao ouch insjrieve veur de optoch van maondig.

Zóndigmörge gaon v’r mit Fanfaar en Sjötterie prins Loek I heim aafhaole veur de mès. Vanwaege ’t jubileumjaor zulle alle oud prinse in dizze sjtoet mittrèkke. In de kèrk zal vanwaege dit jubileum extra geseerd waere. Zeker de meujte waert óm te bekieke. Nao de mès zul v’r bie ’t Taarmenneke de taarbrook oplaote es teike van de sjtart van de 3 gekke daag. In de middig oere is d’r ‘ne sjpringmiddig in ’t Weverke en vanaaf 18:11 kint g’r dao aete mit de prins. Daonao hoof g’r neet heivesj want in de aovend is d’r nog carnaval anno 2023!

Op maondig zal d’r weer ‘ne sjoane optoch door ’t dörp trèkke. Volges de lèste informatie van de gemeinte is Klein Hazel aope en kint de optoch dao gewoon doorheen trèkke. Moch dit óm welke raeje dan ouch neet kinne dan zul v’r vanoet Groat Hazel via De Bockhofwaeg en de Taoresjtraot richting de Baekerbaan gaon. Aansjletend zul v’r in ’t Gemeinsjapshoes de pries oetreike. Hienao kint g’r in datzelfde gemeinsjapshoes en in ’t Weverke terech veur ‘ne gezellige aovend. Mië informatie euver de optoch sjteit in e apaart sjtökske in dit parochieblaedje.

Ouch op dinsdig kint g’r nog carnaval viere in Sjömmert. Vanaaf 14:00 is in ’t Gemeinsjapshoes vanalles te doon. Sjpringkösses, sjminke, ‘ne ballonclown en meziek. V’r zeen uch dao gaer. Óm 20:11 begint in ’t Weverke de finale van carnaval 2023 en rond 23:11 zul v’r dae aafsjlete (meh neet ech natuurlik). ’t Is pas ech gedaon es v’r op esjgoonsdig e esjkrutske haole in de mès van 19:00 oer.

V’r hove ós dus neet te vervaele of aaf te vraoge wo v’r heen mótte gaon. ’t Gans program sjteit weer op de bekinde flyer ‘Carnaval in Sjömmert’ dae dees waek mit dit parochieblaedje bezörg weurt. Dank aan de GOS hieveur.

’t Lètste nuuts vink g’r ouch op www.taarbreuk.nl of op ós facebook pagina.

Alaaf

Prins Loek I, vors Pascal en de Raod van Èlf