CARNAVAL 2026
Taarbreuk Nuuts
V’r wille dit Taarbreuk Nuuts beginne mit ‘ne trukblik op ‘t (F)Auwt Wieverbal van aafgeloupe zaoterdig. Same mit CV De Groate höbbe v’r dit georganiseerd bie Brasserie Bie Ein. ’t Waor gezellig drök en versjillende groepe houwe zich väöl meujte gedaon en d’r get sjoans van gemaak. V’r wille de prieswinnaars felicitere en ederein danke veur de aanwezigheid.
Mit ’t krankebezeuk zin v’r zoa good es klaor. Kómmende zaoterdig waere ouch de luuj bezóg die in ’t ziekehoes ligke. Es g’r emes kint dae dao in ligk dan heuër v’r dat gaer.
Op de daag dat dit parochieblaedje bezörg weurt dan sjtaon v’r aan ’t begin van de carnavalsdaag. Zoa wie eder jaor beginne v’r op dónderdig bie ’t Weverke op de carnavalsaovend van de jeug van de vereiniginge. Eder jaor weer e good begin van de carnaval. Vriedig is de daag van de sjoalcarnaval. Vanaaf 10.00 oer is de ganse sjoal in ’t Weverke aanwezig. Same mit de ouderraad en De Taorekretsers is d’r e leuk programma samegesjtèld. Nuuj dit jaor is dat d’r naeve de sjoalprins en de sjoalprinses ouch ‘ne jeugraod van èlf geïnstalleerd weurt. Truk van weggewaes is de kingeroptoch. Óm 12.30 oer sjtart dae vanaaf de Remigiussjtraot en dan via de Koster Jacobssjtraot, Knolwei, Koster Jacobssjtraot weer truk door de Remigiussjtraot nao ’t Weverke. In de middigoere geit ’t programma dao wiejer en zin ouch de ouwesj welkom.
Vriedigaovend is de sjleuteleuverdrach van de Gemeinte Beekdaelen die dit jaor in ’t Trefcentrum in Nuth gehoute weurt. ’t Begint óm 19.30 oer en daobie is ederein welkom. Nao aafloup kóm v’r truk nao ’t Weverke veur de Friday Night Carnaval van CV De Groate en veur de Sjömmertse Carnaval in de café van ’t Weverke.
Zaoterdigmiddig is in ’t Gemeinsjapshoes de Rumpelmiddig, georganiseerd door de KBO. Vanzelfsjpraekend geit De Taarbreuk hie ouch heen veur e paar gezellige urkes. ’sAoves tösje 20.00 oer en 21.00 oer kint g’r uch insjrieve veur d’n optocht in Café ’t Weverke. In de zaal geit ’t Sjömmerts Vastelaovesleedjes Konkoer van de Auwt Prinse op toer. V’r zin benuujd welk leedje oet de historie van ’t SVK geer kómp oetbeelde.
Zóndigmörge haol v’r same mit de Sjötterie en de Fanfaar Prins Chiel I heim op veur de carnavalsmès die óm 11.00 oer in ós eige kèrk gehoute weurt. Maskers aaf, Harte aope dat is ’t thema van de mès en ouch dit jaor zin d’r weer sjoan tekste oetgezeuk. De leedjes van Sing a Song en de meziek van de Sjötterie en de Fanfaar make de mès compleet. Nao de mès laot v’r de Taarbrook op bie de Taarman op ’t pleintje taegeneuver de kèrk. Óm 14.11oer begint de kingercarnaval in ’t Weverke en es g’r hónger höb dan kint g’r vanaaf 18.11 oer same aete mit de Prins. Dat is dan ouch inins ‘ne gooje baom veur carnaval anno 2026, ouch in ’t Weverke.
Maondig trèk d’n optoch door ’t dörp. Dit jaor is de route angesj vanwaege ’t werk aan de Baekerbaan. In dit parochieblaedje sjteit ’n apaart sjtökske euver d’n optoch mit alle informatie. Nao d’n optoch is de priesoetreiking in ’t Gemeinsjapshoes en in datzèlfde Gemeinsjapshoes en in ’t Weverke is d’r alle tied óm te fiëste nao d’n optoch.
Dinsdigmiddig is in ’t Gemeinsjapshoes ‘ne jeugcarnaval. Op ’t aope podium is d’r alle ruimte veur jeug die wil optraeje. De Taorekretsers numme de organisatie op zich en aan ’t einde van de middig zal ’t sjoalprinsepaar aaftraeje. V’r houpe dat g’r dit nuuj initiatief óngersjteunt mit ’n groate aanwezigheid. In de aovendoere sjleet v’r de carnaval van 2026 aaf in ’t Weverke. Óm 23.11 oer zal dit plaatsvinge mè de ervaring liërt dat ’t hienao nog zeker e paar urkes gezellig doorgeit. Mit ’t esjkrutske op esjgoonsdig sjleet v’r carnaval 2026 dan ech aaf.
’t Is weer ’n ganse opsomming van activiteite die georganiseerd waere. Alles is euverzichtelik gemaak in de flyer ‘Carnaval in Sjömmert’ , meugelik gemaak door de GOS. Dank aan hun veur hun biedrage wodoor dizze flyer hoes aan hoes bezörg kint waere.
V’r kieke oet nao sjoan carnavalsdaag die v’r in eige dörp viere. Es geer mit ós mit viert dan geit dat gans good kómme.
Alaaf
Prins Chiel I, Vors Pascal en de Raod van Èlf