TAARBREUK NUUTS

TAARBREUK NUUTS


Mit e tevreje geveul kinne veer trukkieke op de prinsereceptie van aafgeloupe zóndig. Ongeluifelik wieväöl luuj ooze prins en zien femilie zin kómme felicitere. Dao naeve waore d’r ouch väöl vereiniginge van binne en boete Sjömmert die hun felicitaties kaome euverbringe.

Oos jubilarisse Marc Vroemen 2×11 en Roger Slakhorst 1×11 lid van de Taarbreuk woorte hie zeker neet bie vergaete. ‘N afvaardiging van ’t BCL besjtuur is aan allebei de jubilarisse de bóndsóngersjeijing kómme oetreike.

Roger Slakhorst haet dit jaor ouch nog van de gemeinte Nuth de Orde van Verdienste gekrege. Neet allein vanwaege zien 11 jäörig jubileum me zeker ouch es dank veur al ‘t werk wat hae veur de Sjömmertse carnaval deit.

Names prins Stan I, zien femilie en de 2 jubilarisse wille veer ederein bedanke veur de felicitaties.

Kómmende zaoterdig zulle v’r same mit CV De Groate ‘t Carnabal du Masque organisere in ‘t Gemeinsjapshoes, es opvolger van oze Auw Wieverdisco. ’t Belaof ‘ne sjieke aovend te waere en d’r zin dan ouch al gans get kaarte verkoch. Geer kint uch verkleije van Venetiaans Sjiek tot groatste oud wief van Sjömmert en alles wat dao tösje in zit.

De aovend begint óm 20.30 en rónd 23.11 zal de priesoetreiking zin.

Dat wilt g’r toch zeker neet misse?

Alaaf en tot zaoterdig
Prins Stan I, vors Pascal en de Raod van Èlf.